Si Jesu Cristo Nga ba Ang Nagsasalita Sa KAWIKAAN 8:22-30?

  ANG mga naniniwalang Diyos si Cristo kaya nakapanghihikayat ng mga tao ay gumagamit din ng mga talata sa Biblia, kaya ang nagiging sapantaha tuloy ng mga nakakapakinig, totoo ang kanilang itinuturo dahil sa Biblia naman aniya binasa.

Sa mga hindi nakapagsusuri na napangingibabawan lang ng kung magkaminsan ay bunga na lang ng kanilang matinding paghanga marahil sa kanilang tagapagturo ay hindi na namamalayan na sila ay natuturuan na ng MALING ARAL.

Upang masuportahan ang kanilang paniniwala na si CRISTONG DIYOS ay mayroon nang PRE-EXISTENCE o UMIIRAL na mula pa nang pasimula, ay ginagamit nila ang nakasulat sa KAWIKAAN 8:22-30:

Basahin po natin ang nasabing talata:

KAWIKAAN 8:22-30  “Inari ako ng Panginoon sa pasimula ng kaniyang lakad, bago pinasimulan ang kaniyang mga gawa ng una.   Ako'y nalagay mula noong araw mula ng walang pasimula, bago nalikha ang lupa.  Ako'y nailabas ng wala pang mga kalaliman; nang wala pang mga bukal na sagana ng tubig. Bago ang mga bundok ay nalagay, bago ang mga burol ay ako'y nailabas:  Samantalang hindi pa niya nililikha ang lupa, ni ang mga parang man, ni ang pasimula man ng alabok ng sanglibutan. Nang kaniyang itatag ang langit nandoon ako: nang siya'y maglagay ng balantok sa balat ng kalaliman: Nang kaniyang pagtibayin ang langit sa itaas: nang maging matibay ang mga bukal ng kalaliman: Nang bigyan niya ang dagat ng kaniyang hangganan, upang huwag salangsangin ng tubig ang kaniyang utos: nang kaniyang iayos ang mga patibayan ng lupa: Nasa siping nga niya ako na gaya ng matalinong manggagawa: at ako ang kaniyang ligaya sa araw-araw, na nagagalak na lagi sa harap niya;”

Pagkatapos basahin ang mga talatang iyan ay sasabihin nila na si CRISTO raw ang nagsasalita diyan. Iyan daw ay sinalita ni JESUS nung siya daw ay nandun pa sa Langit kasama ng AMA. Kaya daw napakaliwanag na si CRISTO ay DIYOS, kasi meron daw bang tao na umiral o nandun na bago pa lalangin ang SANGLIBUTAN o ang DAIGDIG?

Ating maitatanong sa kanila:  May nabasa ba kayong si CRISTO ang nagsasalita riyan?

Kung magiging tapat man lang sana sila sa atin, kitang-kita naman sa talata na walang sinasabi na si CRISTO ang nagsasalita diyan.

Kahit siguro basahin niyo pa ang buong aklat ng MGA KAWIKAAN wala kayong mababasa na si CRISTO iyan.

Pero alin ang maliwanag? Napakaliwanag na ang nagsasalita sa KAWIKAAN 8:22-30 ay ang KARUNUNGAN, itataas lang natin ang basa sa verse 12 sa parehong chapter:

KAWIKAAN 8:12  “Akong KARUNUNGAN ay tumatahan sa kabaitan, at aking nasusumpungan ang kaalaman at gunita.”

Siyempre hindi tututol ang mga naniniwalang  si CRISTO ang nagsasalita diyan, at ang sasabihin nila, TAMA ang KARUNUNGAN nga ang nagsasalita diyan, tapos magtatanong sila ng ganito:  HINDI BA SINASABI SA BIBLIA NA SI CRISTO AY KARUNUNGAN NG DIYOS?

At babasahin nila siyempre ang talatang ito:

1 CORINTO 1:24  “Nguni't sa kanila na mga tinawag, maging mga Judio at mga Griego, si CRISTO ang kapangyarihan ng Dios, at ang KARUNUNGAN NG DIOS.”

Maliwanag na sinasabi sa talatang ito na si CRISTO ay KARUNUNGAN ng DIYOS. At hindi po kami TUTUTOL kailan man sa sinasabing iyan ng BIBLIA, dahil talagang nasa BIBLIA iyan.

Saan po kami tumututol?  Tumututol kami sa kanilang maling PAGKAUNAWA na isipin no komo’t sinasabi na KARUNUNGAN NG DIYOS si CRISTO, ay siya mismo ang KARUNUNGAN ng DIYOS na sinasabi sa BUONG BIBLIA.

Eh pano kaya ito?

1 HARI 4:29  “At binigyan ng Dios si SALOMON ng KARUNUNGAN, at di kawasang katalinuhan at kaluwagan ng puso, gaya ng buhanging nasa tabi ng dagat.”

Hindi naman kayo siguro tututol na ang ibinigay na KARUNUNGAN kay Haring Solomon ay KARUNUNGAN ng DIYOS, kaya maitatanong natin sa kanila, si CRISTO ba ang ibinigay na KARUNUNGAN kay Solomon?

Eto pa ang isa:

LUCAS 2:40  “At lumalaki ang BATA, at lumalakas, at NAPUPUSPOS NG KARUNUNGAN: at sumasa kaniya ang biyaya ng Dios.”

Dito sa talatang ito na sinasabi na ang batang si CRISTO ay NAPUPUSPOS ng KARUNUNGAN, si CRISTO rin ba ang KARUNUNGAN na PUMUPUSPOS sa kaniyang sarili diyan?  Hindi ba lalabas na DALAWA na ngayon ang CRISTO? Isang BATANG CRISTO na pinupuspos ng KARUNUNGANG CRISTO?

Siguro naman sa isang taong PALABASA ng BIBLIA na may MALINAW NA PAGIISIP ay hindi nila maaaring matanggap kailan man na si CRISTO ang KARUNUNGAN na binabanggit sa mga talatang iyan. Dahil kataku-takot na salungatan ang mabubuo, at hindi lamang sa mga talatang iyan kundi sa napakarami pang iba.

Isa lang ang MALIWANAG: HINDI LAHAT NG NABABASANG “KARUNUNGAN” sa BIBLIA ay TUMUTUKOY kay CRISTO.

Nakabasa lang kasi na KARUNUNGAN iyong nagsasalita sa KAWIKAAN 8:22-30 ipinagpalagay na, na si CRISTO mismo iyon.

Bakit namin natitiyak na hindi si CRISTO ang sinasabi sa KAWIKAAN na KARUNUNGAN?

Narito ang pruweba: Pansinin ang pagpapakilala ng aklat ng KAWIKAAN sa KARUNUNGAN:

KAWIKAAN 7:4  “Sabihin mo sa KARUNUNGAN, Ikaw ay aking KAPATID NA BABAE; at tawagin mong iyong kamaganak na babae ang unawa:”

Maliwanag na ang ipinakikilalang KARUNUNGAN sa KAWIKAAN ay tinatawag na KAPATID NA BABAE, samakatuwid ISANG BABAE. Kaya kung ipagpipilitan na si CRISTO ang KARUNUNGANG iyan lalabas ngayon na bago pa bumaba si CRISTO at NAGKATAWANG TAO si CRISTO ay ISANG BABAE, at naging LALAKE lang nung nasa LUPA na. PROBLEMANG NAPAKALAKI! Kung ganito ang kakalabasan, ito ay maituturing na ARAL na LABAG na LABAG sa BIBLIA.

Baka naman magpalusot at sabihing, diyan sa KAWIKAAN 7:4 hindi si CRISTO iyan kasi BABAE iyan eh, pero iyong nasa KAWIKAAN 8:22-30, iyun si CRISTO iyun kasi LALAKE iyun.

Puntahan natin iyan, so sa kanilang paniniwala ang BABAE lang na tinutukoy na KARUNUNGAN ay iyong nasa KAWIKAAN 7:4, pero iyong nasa KAWIKAAN 8:22-30 iyun daw ay LALAKE.  Totoo kaya iyun?

Hindi ninyo mapapansin sa TAGALOG na BIBLIA ito, pero sa ENGLISH BIBLE mapapansin natin ng maliwanag, itataas lang natin ang basa sa KAWIKAAN 8:1-3:

KAWIKAAN 8:1-3  “Hindi ba umiiyak ang karunungan, at inilalabas ng unawa ang kaniyang tinig? Sa taluktok ng mga mataas na dako sa tabi ng daan, sa mga salubungang landas, siya'y tumatayo; Sa tabi ng mga pintuang-bayan sa pasukan ng bayan, sa pasukan sa mga pintuan siya'y humihiyaw ng malakas:”  [Ang Biblia 1905]

PROVERBS 8:1-3  “Doth not wisdom cry? and understanding put forth HER voice? SHE standeth in the top of high places, by the way in the places of the paths.  SHE crieth at the gates, at the entry of the city, at the coming in at the doors.” [King James Version]

Kitang-kita na sa TAGALOG makakalusot sila riyan, pero sa isa sa mga BIBLIANG ENGLISH, sa KING JAMES, maliwanag na BABAE ang GENDER ng KARUNUNGAN na tinutukoy diyan. Pansinin ang paggamit ng mga PRONOUN o PANTUKOY na “SHE” at “HER” na PAMBABAE na hindi mapapansin sa TAGALOG.

Kaya kahit saan sila sumuot diyan hinding-hindi sila makakalusot sa katotohanang HINDI SI CRISTO ang TINUTUKOY na KARUNUNGAN na nagsasalita sa KAWIKAAN 8:22-30, Well maliban na lang siyempre kung ituturo nila na si CRISTO ay BABAE o isang DIYOSA bago NAGKATAWANG-TAO, heheheh.

Ngunit ito pa ang lalong higit na magpapatunay na talagang MALI ang kanilang PAGPAPALAGAY na si CRISTO iyan. Dahil ang PANGINOONG JESUCRISTO mismo ay nagpapatunay na BABAE ang KARUNUNGAN gaya ng mababasa sa:

LUKE 7:35  “But WISDOM is justified of all HER children.” [KJV]

Kaya klaro na klaro mula OLD TESTAMENT hanggang NEW TESTAMENT ipinapakilala na BABAE ang KARUNUNGAN.

Kaya masasabi na natin na hindi mapagdududahan na nahulog sa MALING PAGKAUNAWA ang mga gumagamit ng KAWIKAAN 8:22-30 para patunayan na si CRISTO ang nagsabi ng mga salitang iyon dahil siya mismo iyon.

 Ito ang ating iiwanang mga tanong:

1.       KUNG HINDI SI CRISTO ANG KARUNUNGAN SA KAWIKAAN 8:22-30, SINO YUN?

2.       BAKIT BABAE ANG PAGPAPAKILALA SA KARUNGAN?

3.       ANONG URING KARUNUNGAN NG DIYOS SI CRISTO at ANO ANG PAGKAKAIBA niya SA KARUNUNGANG BINABANGGIT sa AKLAT ng KAWIKAAN?

Hanggang sa muling pagtalakay….